About this role
Ved Kreftklinikken på Haukeland universitetssjukehus er det ledig ei stilling som stipendiat knytt til prosjektet ART-FORSEE (“network in Adaptive RadioTherapy For nOvel treatment StRatEgiEs”). ART-FORSEE er ei forskingssatsing på adaptiv stråleterapi. Eit sentralt fokus er utvikling og bruk av medisinske bilde- og datadrivne metodar for å karakterisere svulst og normalvev, følgje endringar gjennom behandlingsforløpet og støtte kliniske avgjerder. PhD-prosjektet som lysast ut, omfattar mellom anna avansert medisinsk bildebehandling, multimodal bildedata, kunstig intelligens (KI), maskinlæring og utvikling av metodar for automatisk analyse og integrasjon av kliniske data. Metodane kan nyttast i ulike delar av kreftbehandlinga, inkludert adaptiv stråle- og protonterapi, men også i andre kliniske problemstillingar knytt til diagnostikk, responsvurdering og persontilpassa behandling. Haukeland universitetssjukehus er ein leiande aktør innan kreftforsking og regionsjukehus for kreftbehandling i Helse Vest. Kreftklinikken har eit sterkt og tverrfagleg forskingsmiljø med tilgang til omfattande kliniske data, avansert medisinsk bildediagnostikk og moderne behandlingsmodalitetar. Stipendiaten vil arbeide i skjeringspunktet mellom teknologi, medisinsk bildebehandling og klinisk kreftforsking, i eit tverrfagleg forskingsmiljø med gode moglegheiter for fagleg utvikling og internasjonalt samarbeid. Stillinga er i 100% over tre år.