About this role
Ved Hjarteklinikken er det ledig stilling som postdoktor innan helseinformatikk/ statistikk og dataanalyse/ dataingeniørfag, knytta til forskingsgruppa PROCARD. Stillinga er 100% stilling i 2 år, med oppstart 01.12.2026.Hjarteklinikken ved Haukeland universitetssjukehus er ei spesialavdeling der all behandling av hjartesjukdommar er samla. Hjarteklinikken driv med høgspesialisert utgreiing og terapi innan følgande område: Ikkje-invasiv biletdiagnostikk, invasiv koronardiagnostikk/terapi og perkutane ventilimplantasjonar, torakskirurgi, intensiv- og overvakingsmedisin, pacemaker-, ICD- og CRT behandling, hjartesviktpoliklinikk, tachyarytmi, preventiv kardiologi og kongenitt kardiologi.PROCARD er ei tverrfagleg forskinggruppe med forankring i Hjarteklinikken, og har som mål å fremje ei pasientsentrert pleie og behandling, kor pasienten aktivt kan delta i beslutningar om eiga helse. Forskargruppa har særleg kompetanse innan store observasjonsstudiar, digital helseinnovasjon, brukarmedverknad og implementering i praksisnære kontekstar. PROCARD er ei svært aktiv og produktiv forskargruppe med eit stort stipendiat- og postdoktormiljø.Stillinga er knytt til eHjerteRehab-prosjektet leia av professor Tone M. Norekvål og finansiert av Norges Forskningsråd. eHjerteRehab er ei tverrfagleg forskings- og innovasjonssatsing som utviklar, testar og evaluerer framtidsretta digitale helsetenester for personar med hjartesjukdom. Prosjektet kombinerer klinisk forsking med metodar frå informatikk, datavitskap, maskinlæring, biostatistikk og biomedisinsk teknologi for å utvikle meir presise, persontilpassa og skalerbare rehabiliteringsløysingar. eHjerteRehab programmet vert no evaluert i ei stor randomisert kontrollert studie (RCT).Forskinga omfattar heile innovasjonskjeda, frå metodeutvikling og teknologidesign til validering, implementering og evaluering i klinisk praksis. eHjerteRehab nyttar store og komplekse datasett, inkludert longitudinelle kliniske data, registerdata, digitale biomarkørar og biomarkørar frå biobank, for å skape ny kunnskap om sjukdomsmekanismar, rehabiliteringsforløp og behandlingseffekt. Stillinga gir høve til å arbeide i skjeringspunktet mellom helsevitskap og digital innovasjon, med mål om å utvikle kunnskap og løysingar som kan bidra til morgondagens helseteneste.Det vil vere mogeleg å søke om utanlandsopphald frå Norges Forskningsråd via eHjerteRehab-prosjektet. Forskingsgruppa har eit stort internasjonalt nettverk.